Börn og unglingar

Unga fólkið tekur virkan þátt í helgihaldinu í Hallgrímskirkju.
Unga fólkið tekur virkan þátt í helgihaldinu í Hallgrímskirkju.

Sunnudagar og börnin

Alla sunnudaga kl. 11.00 er eitthvað í boði fyrir börnin. Á veturna er sunnudagaskóli en á sumrin er ávallt í boði leikföng, bangsar og bækur inn í kirkju. Á veturnar þegar barnastarfið er hefst starfið í sameiginlegri guðsþjónustu í kirkjunni en síðan fara börnin með leiðtogum sínum í Norðursal til að eiga skemmtilega stund saman.

Við lok barnastundarinnar er alltaf boðið upp á barnaveitingar í messukaffinu og litlir fingur geta litað og föndrað á meðan pabbi, mamma, afi eða amma fá sér kaffi. Börn á öllum aldri eru hjartanlega velkomin í barnastarf Hallgrímskirkju!

TTT klúbburinn

TTT klúbburinn er fyrir tíu til tólf ára krakka. Fundirnir eru haldnir í kjallara kirkjunnar á miðvikudögum kl. 14.30-15.30. Í ár ætlar TTT klúbburinn að leggja áherslu á leiklist, semja, skapa stemmningu, safna leikmunum, búa til búninga og halda sýningar. Þetta verður leikandi skemmtilegur vetur!

Foreldramorgnar

Alla miðvikudagsmorgna ársins, líka yfir sumartímann, eru foreldramorgnar í kórkjallara Hallgrímskirkju kl. 10-12. Þessar samverur eru fyrir foreldra og börn þeirra og henta þeim sem eru í fæðingarorlofi eða eru heimavinnandi. Tilgangurinn er að efla félagsleg tengsl foreldra og barna þeirra í Hallgrímssókn. Boðið er upp á hressingu. Umsjón með foreldramorgnum hefur Inga Harðardóttir guðfræðingur og æskulýðsfulltrúi Hallgrímskirkju.

Æskulýðsfélagið Örkin

Alla þriðjudaga yfir veturinn kl. 19.30 – 21.30 hittast unglingar úr 8. – 10. bekk í kórkjallara kirkjunnar. Á dagskránni eru leikir, sprell og ýmislegt skemmtilegt í samvinnu við unglingana. Auk þess er sögð saga úr Biblíunni. Í október á hverju ári svo farið yfir helgi á unglingalandsmót ÆSKÞ (Æskulýðssamband Þjóðkirkjunnar) ásamt öðrum unglingastörfum kirkjunnar. Allir unglingar velkomnir!