Orgelin

Konsertorgelið
Konsertorgelið

Konsertorgel

Konsertorgelið við vesturgaflinn í Hallgrímskirkju er stærsta orgel á Íslandi og sækjast organistar víða um heim eftir að leika á orgelið og hljóðrita í kirkjunni. Það var vígt í desember 1992, smíðað af Johannes Klais orgelsmiðjunni í Bonn í Þýskalandi. Orgelið hefur 4 hljómborð og fótspil, 72 raddir og 5275 pípur. Orgelið er 15 metra hátt, vegur um 25 tonn og stærstu pípurnar eru um 10 metra háar. Kaup á orgelinu voru fjármögnuð að miklu leyti með gjöfum. Fólki var boðið að kaupa pípurnar og enn er hægt að kaupa gjafabréf í verslun kirkjunnar sem vottar að viðkomandi sé eigandi tiltekinnar pípu.

Klaisorgelið er notað við helgihald kirkjunnar auk þess sem það hefur hlotið almenna viðurkenningu sem frábært tónleikahljóðfæri. Tilkoma færanlega orgelborðsins hefur aukið notkunarmöguleika orgelsins verulega, bæði hvað varðar tónleika- og helgihald. Um leið er þetta langstærsta orgelið á Íslandi og er rómað meðal organista víða um heim fyrir gæði, fjölbreytt raddval og hversu vel það fellur að rými kirkjunnar.

Kórorgel

Í norðurskipi kirkjunnar, innst við kórinn, er 10 radda kórorgel byggt af Th. Frobenius og Sønner Orgelbyggeri A/S í Lyngby í Danmörku og vígt í desember 1985. Það er tíu radda, mekanískt, með svelli á báðum spilaborðum. Það leysti af hólmi 14 radda tékkneskt Rieger-Kloss orgel sem upphaflega hafði verið sett upp í kapellu í kórkjallara árið 1956 og flutt í suðurálmu turnsins þegar kapellan var vígð þar árið 1974. Þegar kirkjan var síðan vígð í október 1986 var það flutt þangað sem það er núna og þannig hefur það þjónað kirkjunni síðan, þar af eitt fyrstu sex árin.