ERT ÞÚ Á ALDRINUM 10-14 ÁRA OG HEFUR GAMAN AF ÞVÍ AÐ SYNGJA?
Kórinn er ætlaður stúlkum og drengjum á aldrinum 10-14 ára, af stórhöfuðborgarsvæðinu.
Kórstjóri er Ása Valgerður Sigurðardóttir.
Kórinn æfir tvisvar í viku, á þriðjudögum kl. 17:00 – 18:30 og fimmtudögum í september kl 16:00 – 17:00 (en 17 – 18.30 eftir það). Fyrsta kóræfing vetrarins er fimmtudaginn 7. september 2017 kl. 16:00. Starfstímabil kórsins er frá byrjun september til maí.
Á DAGSKRÁ KÓRSINS fram til jóla er
11. september DRENGJAKÓRAMÓT í Neskirkju
september/október: UPPTÖKUR á áður sungnu efni
8. október kl. 11:00: MESSUSÖNGUR í Hallgrímskirkju
10. – 12. nóvember KÓRAMÓT í Langholtskirkju
19. nóvember kl. 11:00: FJÖLSKYLDUMESSA í Hallgrímskirkju
25./26. nóvember: „Inngangur að aðventu“ FJÖLSKYLDUSTUND
(desember: SÖNGUR Í MIÐBÆNUM Á AÐVENTU? – jólalögin ofl)
24. desember kl. 18:00: söngur í hátíðarmessu á AÐFANGADAG.
Í apríl & maí tekur kórinn svo þátt í æskulýðsmessu og vorhátíð Hallgrímskirkju.
Nánari upplýsingar um skráningu og kórstarfið í Hallgrímskirkju fást hjá Ásu Valgerði kórstjóra.
Netfangið er: asa@hallgrimskirkja.is
Skráning í kórinn – smellið HÉR
Markmið
Við viljum að nemendur fái tækifæri til að njóta sín gegnum tónlist og upplifa gleðina við að syngja í kór. Við veljum fjölbreytt tónlistarleg viðfangsefni, íslensk og erlend, veraldleg og trúarleg.
Við leggjum áherslu á virka hlustun, taktþjálfun, raddaðan söng og keðjusöng með eða án undirleiks, sem og framkomu, tjáningu, samvinnu, aga og virðingu fyrir hvert öðru og viðfangsefnunum.
Við viljum miðla lifandi arfi til komandi kynslóðar. Við viljum efla kórastarf því það er félagslega, tónlistarlega og trúarlega þroskandi og gefandi.
Við viljum gefa börnum kost á að mynda jákvæð og virk tengsl við kirkjuna sína í gegnum tónlistarstarf, sem bæði kostar lítið og er ekki kynjaskipt. Við viljum hvetja kórbörnin, foreldra þeirra og fjölskyldur, til að vera virk í starfinu, utan kirkju sem innan.
Hvað kostar að vera með?
Gjaldið er 8 þúsund krónur fyrir hvora önn, haust og vor samtals 16 þúsund veturinn. Systkini í kórnum borga hálft gjald hvert. Velkomið að skipta greiðslum.
Kórstjórinn
Ása Valgerður Sigurðardóttir útskrifaðist frá Tónmenntakennaradeild KHÍ 1995 og var þar af haustið 1994 í Frakklandi sem Erasmus nemi við kennaradeild Tónlistarháskólans í Tours. Starfaði næstu 11 ár við tónmenntakennslu í Snælandsskóla í Kópavogi. Setti þar árlega upp söngleiki auk tónmenntakennslu í 1. – 7. bekk, kenndi á blokkflautu í Forskóla Tónlistarskóla Kópavogs og starfaði auk sem meðleikari á píanó með Kór Snælandsskóla. Lauk námi á miðstigi í söng og píanóleik við Tónlistarskóla FÍH árin 2000-2002. Árið 2008 lagði Ása stund á nám í Markþjálfun (Coaching-ACC þjálfun) hjá Leiðtoga/Evolvia ehf.
Haustið 2006 hóf Ása störf sem tónmenntakennari við Skóla Ísaks Jónssonar í Reykjavík og sem kórstjóri síðastliðin 6 ár. Kórinn hefur vaxið hratt ár frá ári, allt að 80 börn á aldrinum 6-10 ára í tveimur kórum árið 2012 enda er mikil söngiðkun og áhugi í Ísaksskóla. Það er því einstakt ánægjuefni að geta boðið fráfarandi Ísaksskólanemendum og öllum börnum og unglingum á aldrinum 10-13 ára sem búa á höfuðborgarsvæðinu, upp á kórstarf í Hallgrímskirkju frá og með haustinu 2015! Þess má geta að Ása hefur sungið með Mótettukór Hallgrímskirkju undir stjórn Harðar Áskelssonar kórstjóra og organista kirkjunnar, síðastliðin 5 ár, frá haustinu 2010.
Hægt er að hafa samband við Ásu í gegnum síma: 6994373, emailið: asa@hallgrimskirkja.is og inn á síðu kórsins inn á facebook: Barna og unglingakór Hallgrímskirkju.
Myndir:
