ARVO PÄRT – POULENC – FINNUR KARLSSON

Björn Steinar Sólbergsson er organisti og tónlistarstjóri Hallgrímskirkju og kennir jafnframt orgelleik við Tónskóla Þjóðkirkjunnar og Listaháskóla Íslands. Hann nam við Tónlistarskólann á Akranesi og Tónskóla Þjóðkirkjunnar og stundaði síðan framhaldsnám á Ítalíu hjá James E. Göettsche og í Frakklandi við Conservatoire National de Region de Rueil Malmaison hjá Susan Landale, þaðan sem hann útskrifaðist með einleikarapróf í orgelleik árið 1986.

Björn Steinar starfaði sem organisti við Akureyrarkirkju í 20 ár og vann að uppbyggingu tónlistarstarfs þar áður en hann tók við starfi organista við Hallgrímskirkju. Hann hefur haldið fjölda einleikstónleika hér heima og erlendis, hljóðritað fyrir útvarp og sjónvarp og leikið inn á hljómplötur, m.a. orgelkonsert Jóns Leifs fyrir útgáfufyrirtækið BIS en sú plata hlaut einróma lof gagnrýnenda. Þetta er í þriðja sinn sem Björn Steinar leikur einleik í orgelkonsert Poulencs en hann lék hann á Kirkjulistaviku í Akureyrarkirkju með Kammerhljómsveit Akureyrar árið 1989 og aftur 1997 með Sinfóníuhljómsveit Íslands.

Una Sveinbjarnardóttir er konsertmeistari Kammersveitar Reykjavíkur og starfar sem konsertmeistari hjá Sinfóníuhljómsveit Íslands. Hún kemur fram sem einleikari og leiðari hérlendis sem erlendis og fæst einnig við tónsmíðar. Hún hefur spilað á fjölda upptaka meðal annars með Björk, (Homogenic, Vulnicura, Fossora), Jóhanni Jóhannssyni, Ensemble Modern, Útvarpshljómsveit Berlínar RSB og hljómsveit Þýsku óperunnar. Hún hefur unnið með Pierre Boulez, Krystof Penderecki, Mstislav Rostropovich, Marek Janowski og Heinz Holliger, einnig Atla Heimi Sveinssyni, Helmut Lachenmann og fjölda samtímatónskálda. Fyrsta plata Unu, Fyrramál, kom út 2007, önnur platan Umleikis (2014) hefur að geyma eigin tónsmíðar hennar fyrir sólófiðlu og árið 2021 gaf hún út plötuna Last Song ásamt Tinnu Þorsteinsdóttur píanóleikara. Una er einn stofnfélaga Strokkvartettsins Sigga og hún myndar ásamt Arngerði Maríu Árnadóttur dúóið Translations sem mun koma fram í Hallgrímskirkju í júní.

Steinar Logi Helgason lærði á píanó í Tónmenntaskóla Reykjavíkur, Nýja Tónlistarskólanum og í Tónlistarskólanum í Reykjavík. Hann hóf nám í Tónskóla Þjóðkirkjunnar árið 2010 og tók þar kirkjuorganistapróf en lauk síðar bakkalárgráðu af kirkjutónlistarbraut Listaháskóla Íslands undir handleiðslu Björns Steinars Sólbergssonar. Steinar Logi stundaði stjórnandanám til meistaraprófs við Konunglega tónlistarháskólann í Kaupmannahöfn og útskrifaðist þaðan í lok árs 2020. Hann hefur stjórnað fjölda kóra og starfað víða sem organisti, píanóleikari og stjórnandi. Hann var tilnefndur til Íslensku tónlistarverðlaunanna árið 2021 ásamt Cantoque Ensemble sem tónlistarhópur ársins í flokki sígildrar og samtímatónlistar. Steinar Logi tók við stöðu kórstjóra Hallgrímskirkju haustið 2021.

Kammersveit Reykjavíkur var stofnuð árið 1974 og fagnar því 50 ára afmæli á þessu starfsári. Hún heldur reglulega tónleika og spannar verkefnavalið kammertónlist allt frá barokktímanum til nútímans. Kammersveitin hefur frumflutt fjölda tónverka eftir íslensk og erlend tónskáld og á undanförnum árum hefur hún lagt áherslu á útgáfu þeirra mörgu verka sem íslensk tónskáld hafa samið sérstaklega fyrir hana. Þar má nefna þrjá hljómdiska með verkum Atla Heimis Sveinssonar (Á gleðistundu, Tíminn og vatnið, I call it) og hljómdiskinn Langur skuggi með kvartettum eftir Atla Heimi, Karólínu Eiríksdóttur, John Speight, Leif Þórarinsson og Svein Lúðvík Björnsson, auk septetts eftir Hauk Tómasson. Á safndisknum Gríma, sem út kom árið 2016, eru verk níu tónskálda og sýnir hann glöggt það margbreytilega hlutverk sem Kammersveitin gegnir í íslensku tónlistarlífi samtímans. Nýjasta plata sveitarinnar er Windbells (2022) sem geymir verk eftir Huga Guðmundsson.