Fréttir af safnaðarstarfi

Borgin styrkir verkefni Ólafs Elíassonar í turni

Fimmtudaginn 7. apríl síðastliðinn skrifaði Reykjavíkurborg undir samning við Hallgrímskirkju um að taka þátt í fjármögnun á innsetningu eftir Ólaf Elíasson sem ráðgert er að verði bæði á 8. og 9. hæð í turni kirkjunnar sem stundum eru nefndar útsýnishæðirnar. Reykjavíkurborg greiðir Hallgrímskirkju samtals 20 milljónir króna í styrk sem deilist niður á þrjú ár. Dagur B. Eggertsson borgarstjóri og Sigríður Hjálmarsdóttir , framkvæmdastjóri Hallgrímskirkju, skrifuðu undir samninginn.

Brauð lífsins

Viltu gefa bænatré?

Bænatréð í Hallgrímskirkju er fullnýtt. Komufólk í Hallgrímskirkju biður gjarnan bænir og bindur garnspotta á bænatréð í mismunandi litum og í samræmi við bænirnar. Bænatré eru gjarnan í Hallgrímskirkju á föstunni fyrir páska. Nú er búið að binda svo marga spotta á tréð að fleiri komast varla fyrir. Tréð hefur verið við inngang kikjunnar en í dag fluttum við tréð upp í kór. Þar verður það næstu vikur. Brumin á bænatrénu, sem er birkitré, eru byrjuð að springa út. Birkilaufin eru sýnileg eins og svar af hæðum við öllum mismunandi og litríku bænunum. En hvað með bænir þeirra sem koma í kirkjuna næstu vikur? Fá þau ekki tækifæri til að tákna bænir sínar með því að hengja litríka spotta á bænatré? Jú, ef einhver er svo gjafmildur að gefa Hallgrímskirkju nýtt tré! Er 2,5-3 metra hátt birkitré í garðinum þínum sem langar til að fara í kirkju? Vilt þú gefa það kirkjunni til að það þjóni sem bænatré. Ef svo er hafðu samband við okkur. Síminn er 510 1000. 

Les Passíusálmana í síðasta sinn!

Sigurður Skúlason flytur Passíusálmana í Hallgrímskirkju 15. apríl, föstudaginn langa, 2022. Sigurður hefur oft lesið Passíusálmana, m.a. í Grafarvogskirkju, Kópavogskirkju, Guðríðarkirkju og Hallgrímskirkju í Saurbæ. Hann er því handgenginn sálmunum og hefur mótaðar skoðanir á túlkun og lestrarháttum. Sigurður les Passíusálmana í síðasta sinn í ár, 2022. Oftast hefur hópur lesara flutt sálmana í Hallgrímskirkju. En Sigurður mun einn lesa passíusálmana sem er þrekvirki. Sigurður hefur starfað sem leikari, stundað ritstörf og starfað við kennslu. Hann hefur leikið í sjónvarpi og kvikmyndum og leikhúsi. Lestur passíusálma er árlegur viðburður í Hallgrímskirkju og lestur Sigurðar í ár er stórviðburður.

Passíusálmarnir koma út á finnsku og færeysku

Passíusálmarnir vekja athygli og eru útflutningsvara. Nú er nýrra þýðinga að vænta. Sálmarnir verða gefnir út á færeysku og Tytti Issakanine er að þýða sálmana á finnsku.

Neyðarópið sem frumóp

Hin blóðuga, særða og þungaða kona, Mariana í Mariupol, lifði af árás á fæðingardeildina. Myndirnar af henni þegar hún staulaðist milli hæða í húsarústunum fóru um allan hinn rafræna heim. En Mariana fæddi lifandi barn, þrátt fyrir að fæðingardeildin hefði verið eyðilögð. Það var dóttir sem lifði. Í gær var tilkynnt að hún hafi verið nefnd Veronika. Hvað þýðir það nafn: Boðberi sigurs. Stórkostlegt. Lífið heldur áfram.

Ástarrannsóknir

ástin er eitt mikilvægast fyrirbæri mannlífsins. Hvernig nálgast fræðimenn þetta svið.

Friðargjörningur

Tónleikar voru haldnir í Hallgrímskirkju 8. mars til að tjá samstöðu með Úkraínumönnum. Fjöldi listamanna og ræðumanna sungu, töluðu og tjáðu frið. Friðargjörningurinn var samstarfsverkefni margra aðila og Hallgrímskirkja var einn þeirra. Einar Karl Haraldsson, formaður sóknarnefndar, lagði raunar til að viðburðurinn yrði í kirkjunni. Flest starfsfólk kirkjunnar kom að undirbúningi og framkvæmd þessa friðargjörnings og Kór Hallgrímskirkju söng.

Þær bökuðu upp kirkjuna!

Kvenfélag Hallgrímskirkju er 80 ára í dag. Félagskonurnar hafa þjónað söfnuðinum stórkostlega og lagt til fé til starfs kirkjunnar. Þær "bökuðu upp kirkjuna" og lögðu kirkjunni til búnað til helgihalds og safnaðarlífs.

Friðartónleikar þriðjudag kl. 18

Friðartónleikar í Hallgrímskirkju verða þriðjudaginn 8. mars kl. 18. Fram koma Ragnar Kjartansson, Bubbi Morthens, KK, Ellen Kristjánsdóttir, Þorsteinn Einarsson í Hjálmum, Alexandra Chernyshova, Kór Hallgrímskirkju, Eyþór Gunnarsson, Sigga, Beta og Elín Ey og Jói P. og Króli. Ávörp flytja Kári Stefánsson og Cristofer Cristofer. Úkraínumenn sæta nú miskunnarlausum árásum af hálfu nágranna sinna, Rússa. Komum saman og sýnum samhug okkar með úkraínsku þjóðinni og líka með rússneskum almenningi sem mætir grimmd og harðræði fyrir að mótmæla innrásinni. Þessi mikli harmleikur snertir okkur öll. Allir eru velkomnir meðan húsrúm leyfir og hægt verður að kveikja á friðarljósi fyrir Úkraínu.